Innandyra

Áður en þú málar með innimálningu

Áður en þú hefst handa við að mála, er mikilvægt að gefa sér tíma í undirbúnings- og grunnvinnu. Með því að grunna áður en málað er jafnar þú undirlagið og hylur hugsanlegar mislitanir, bletti, kvisti o.þ.h. Það dregur úr líkum á að blæði í gegnum málninguna að verki loknu. Grunnmálningin hjálpar líka málningunnni að ná sem bestri viðloðun við undirlagið og minnkar þannig hættu á flögnun.

Tegundir innimálningar

Val á réttri tegund innimálningar ræðst af því hvaða rými verið er að mála og hverjar kröfur þínar um lokaáferð eru. Hægt er að velja milli loftamálningar og veggjamálningar, en hvort tveggja gerir mikið fyrir heildarútlit heimilisins. Með veggjamálningu má breyta ásýnd veggja og rýma með fljótlegum og auðveldum hætti, t.d. með nýjum lit. Einnig er hægt að nota spartlmálningu til að kalla fram enn sterkari hughrif og gefa rýminu sérstöðu.

Með tímanum geta loft líka látið á sjá af ýmsum ástæðum, t.d. upplitun frá sólarljósi, gulnun eða rakablettir. Með því að endurmála loftin með loftamálningu færðu nýja, fallega filmu í loftið sem endurkastar ekki ljósi og endist vel og lengi. Ef um er að ræða votrými er mælt með að notast við sérstaka votrýmismálningu sem hönnuð er til að þola betur raka og vatnsálag. Votrýmismálning myndar slitsterka filmu sem þolir vel þrif og vinnur gegn myglu og sveppavexti.

Gólf, karmar og gluggar geta líka gert mikið fyrir heildarútlit heimilisins. Þessir fletir eru gjarnan útsettari fyrir álagi og sliti með tímanum, en með því að endurmála þá má gera heilmikið fyrir heildarútlitið. Nýtt lag málningar eykur líka endingu þar sem endurmálun bætir í raun nýju slitlagi við flötinn og gerir það að verkum að hann er betur varinn gegn hugsanlegu sliti vegna daglegrar notkunar.

Innimálning fæst meðal annars sem:

• Veggjamálning
• Spartlmálning
• Loftamálning
• Gólfmálning
• Votrýmismálning
• Panelmálning
• Gluggamálning
• Málning fyrir járn og málma
• Ofnamálning
• Viðarmálning

Ef þú vilt ekki mála timbur eða við innanhúss í þekjandi lit er líka hægt að bera á hann tréolíu í staðinn. Olíuborinn við þarf með reglulegu millibili að endurmeðhöndla með nýju lagi af tréolíu. Ef það er ekki gert, þá munu tréhúsgögn, borðplatan í eldhúsinu eða annað tréverk innanhúss, með tímanum missa gljáann og virka veðrað og slitið.

Skreyting og sköpun

Þú getur líka fengið málningartegundir sem henta vel í skreytingar og skapandi verkefni innanhúss. Sem dæmi má nefna töflumálningu og segulmálningu.

Töflumálning er sérhæfð tegund málningar, sem þolir krít. Þú getur því notað hana til að mála krítartöflu á vegg. Með segulmálningu getur þú málað segultöflu á vegginn og hengt þar upp segla, líkt og á ísskápnum þínum. Þessar tegundir henta því vel til að búa til upplýsinga og/eða skipulagstöflu á heimilinu, eða jafnvel fjölskylduvegg þar sem þú hengir upp myndir af börnunum þínum og listaverkin þeirra.