Málningarúllur fyrir við

Hvaða málningarrúlla hentar á timbur?

Val á réttri rúllu fyrir timbur ræðst af því hvers konar timbur skal mála. Það er nefnilega töluverður munur á að mála annars vegar þéttan, lokaðan og sléttan við, eins og t.d. borðplötur, hurðar og húsgögn, og hins vegar stóra viðarfleti utanhúss, eins og t.d. sólpalla, skjólgirðingar og þakkanta.

Málningarrúlla fyrir tréverk innahúss

Tréverk, innanhúss hefur almennt slétt og lokað yfirborð og því hentar allajfana best að nota snögghærða rúllu, svamprúllu eða örtrefjarúllu. Þessar rúllur bera minna af efni og auðvelda þér því að mála í þynnra og jafnara lagi, sem minnkar líkur á rúlluförum. Þannig auðveldar rúllan þér að ná fallegri og jafnri áferð þegar þú málar t.d. innihurðar eða innihúsgögn.

Lítil rúlla með stuttum hárum getur líka nýst vel til að mála í hornum, þar sem þú myndir venjulega þurfa að nota pensil. Með því að nota litla rúllu í stað pensils í hornum og á kanta á t.d. húsgögnum, kemur þú í veg fyrir penslaför sem geta stungið í augu og þú færð í staðinn einsleitari áferð.

Ef þú ert að mála loftaklæðningu úr timbri getur verið gott að nota milligrófa eða grófa rúllu. Breiðari og grófari rúlla ber meira efni og hentar því vel til að rúlla slíka fleti á skemmri tíma. Með því að nota framlengingarskaft má svo auðvelda loftamálunina enn meira og flýta fyrir.

Málningarrúlla fyrir tréverk utandyra

Ef þú ert að mála tréverk utandyra þá hentar yfirleitt vel að nota stærri og breiðari málningarrúllu. Þegar verið er að mála timbur utandyra þá er allajafna ekki gerð eins mikil krafa um þunna lagþykkt og slétta áferð án rúllufara. Timbrið er yfirleitt grófara og þess vegna hentar vel að nota breiða og grófa rúllu. Það á við, hvort sem um ræðir tréolíu eða þekjandi viðarvörn. Einnig er ágætt að hafa við hendina góðan, breiðan kústpensil til að vinna viðarvörnina betur ofan í viðinn.

Málningarrúlla á timbur:

• Svamprúlla
• Örtrefjarúlla (Microfiber)
• Fín málningarrúlla með stuttum hárum
• Gróf rúlla með löngum hárum (utandyra)