Penslar fyrir tréverk

Penslar sem henta á tréverk

Málun tréverks getur bæði snúist um afköst á stórum svæðum eins og timburklæðningu utan á húsi, og nákvæmnisvinnu, t.d. á garðhúsgögnum og gluggalistum. Veldu góðan pensil, með hliðsjón af því verkefni sem fyrir liggur. Með því að velja réttan pensil má spara sér mikinn tíma, auðvelda sér vinnuna og hámarka líkur á fallegri áferð.

Þessir penslar henta á tréverk:

• Flatur pensill
• Útipensill / Kústpensill
• Hringpensill
• Skáskorinn pensill

Útipensill / Kústpensill

Kústpensill eða útipensill er stór og breiður pensill sem hentar vel til að mála stóra fleti. Hentar þannig vel í málun eða viðarvörn, t.d. á sólpalla, skjólveggi eða utanhússklæðningar úr timbri. Pensillinn tekur í sig mikið efni og getur þannig auðveldað og flýtt fyrir verkinu. Gott er að nota kústpensil á stóra timburfleti en hafa jafnframt minni pensil við hendina til að ná til minni svæða og svæða þar sem meiri nákvæmni er krafist.

Flatur pensill

Flatur pensill er góður alhliða pensill sem hentar í flestar gerðir málningarvinnu, þ.m.t. málun tréverks. Hann tekur í sig mikið af málningu og skilar góðri áferð. Flatur pensill hentar vel á tréhúsgögn, panelklæðningar, karma, lista og annað tréverk innandyra sem utan.

Hringpensill

Hringpensill hentar vel til að bletta og í smáviðgerðir á tréverki, bæði innandyra og utan. Hringpensill getur hentað vel til að mála húsgögn eða í nákvæmnisvinnu, t.d gluggapósta og hurðakarma.

Skáskorinn pensill

Skáskorinn pensill hentar sérstaklega vel í nákvæmnisvinnu. Með skáskornum pensli er auðveldara að mála beinar línur. t.d. í skurði meðfram hornum, hurðum, gluggum eða gólfum. Eins hentar vel að nota skáskorinn pensil í fínvinnu á tréverki utandyra eða til að mála tréglugga og hurðir.